Штогод у Дзяржаўным літаратурна-мемарыяльным музеі Якуба Коласа падчас чароўных зімовых святаў адбываюцца душэўныя калядныя сустрэчы, якія адметны сваім духоўным зместам, бо сярод арганізатараў – святары з Палесся, мясціны, дзе пачынаў сваю педагагічную дзейнасць Якуб Колас.
Літаратурна-музычныя сустрэчы пад назвай «Каляды Доме Коласа» пачалі праводзіцца амаль дзесяць гадоў таму. Гэта была асабістая ініцыятыва ў светлай памяці Уладыкі Сцяфана (1944-2022), архіепіскапа Пінскага і Лунінецкага. Уладыка цытаваў радкі з Якуба Коласа, раіў трымацца каранёў і адзначаў: «Хочаце мудрасці? Чытайце «Новую зямлю».
На свяце «Каляды ў Доме Коласа» сёння адбылася сустрэча з кіраўнікамі аддзелаў Пінскай епархіі Іаанам Гарбуновым і Андрэем Гарбуновым, сям'ёй Якуба Коласа, журналісткай Таццянай Канапацкай, пісьменнікамі С. Трахіменкам і І. Фраловай, прагучалі спевы ў выкананні мужчынскага хору “Усіхсвяцкі” Прыходу ў гонар Усіх Святых у Мінску.
